Dyfarnwyd £600,000 i gymunedau ledled Cymru drwy bartneriaeth gyda’r Principality

Rydym yn falch iawn o rannu’r rownd ddiweddaraf o gyllid a ddyfarnwyd drwy ein partneriaeth â Chymdeithas Adeiladu’r Principality, sydd wedi gweld £600,000 yn cael ei fuddsoddi mewn cymunedau ledled Cymru.

Yn y rownd hon, dyfarnwyd £500,000 i 15 o sefydliadau drwy Gronfa Cenedlaethau’r Dyfodol y Principality, ynghyd â bron i £100,000 i bedwar sefydliad drwy Gronfa Ôl-osod ar gyfer y Dyfodol. Mae’r ddwy gronfa’n cefnogi grwpiau ar lawr gwlad sy’n gwneud gwahaniaeth gwirioneddol – o helpu pobl ifanc i ffynnu, i wella effeithlonrwydd ynni adeiladau cymunedol.

Ers lansio’r cronfeydd yn 2022, mae £2 filiwn bellach wedi’i ddyfarnu drwy’r ddwy raglen, a gyflwynir mewn partneriaeth â Principality. Dyfernir grantiau’n flynyddol i sefydliadau dielw ledled Cymru, gan gynnwys elusennau a grwpiau cymunedol sy’n gweithio’n uniongyrchol gyda phobl leol.

Mae prosiectau a gefnogwyd eleni yn cynnwys sefydliadau fel Mid Powys Youth Theatre, Stepping Stones North Wales, Newport Cricket Club, a Child of the Earth CIC yng Ngogledd Sir Benfro, sy’n darparu profiadau cynhwysol, seiliedig ar natur, i deuluoedd plant ag anghenion dysgu ychwanegol.

Mae’r cronfeydd hyn yn adlewyrchu ymrwymiad hirdymor Principality i les cymdeithasol, pobl ifanc a chynaliadwyedd amgylcheddol, yn unol ag egwyddorion Deddf Llesiant Cenedlaethau’r Dyfodol (Cymru).

Dywedodd Nigel Taylor, Pennaeth Brand, Effaith a Chyfathrebu yn Gymdeithas Adeiladu’r Principality, ei fod yn falch o weld effaith dyfarniadau eleni:

“Mae cefnogi rhoi elusennol a chymunedau ledled Cymru a yn ganolog i’n gwerthoedd ni yn Principality Building Society. Fel sefydliad cydfuddiannol, rydym yn ail-fuddsoddi hyd at 3% o’n helw er budd ein Haelodau – mae’r ymrwymiad hwn yn rhan graidd o’n pwrpas, sef adeiladu cymdeithas decach. Rydym yn hynod falch o weld yr holl brosiectau a sefydliadau sydd wedi elwa o gronfeydd eleni. Mae Cronfa Cenedlaethau’r Dyfodol a Chronfa Ôl-osod ar gyfer y Dyfodol yn gwneud gwahaniaeth gwirioneddol i fywydau pobl ledled Cymru ac yn cefnogi achosion pwysig – rhywbeth rydym wedi ymrwymo’n gadarn iddi.”

Ychwanegodd Richard Williams, Prif Weithredwr Sefydliad Cyunedol Cymru:

“Rydym yn falch o barhau â’n partneriaeth â Chymdeithas Adeiladu’r Principality wrth i ni ddechrau ein pumed blwyddyn o weithio gyda’n gilydd i gefnogi cymunedau ledled Cymru. Drwy Gronfa Cenedlaethau’r Dyfodol a Chronfa Ôl-osod ar gyfer y Dyfodol, mae’r bartneriaeth hon wedi cefnogi gwaith gyda phobl ifanc ac wedi helpu cymunedau i gymryd camau ymarferol i leihau eu costau ynni a’u heffaith amgylcheddol. Trwy weithio mewn partneriaeth, gallwn sicrhau bod cyllid yn cyrraedd sefydliadau ar lawr gwlad ac yn ymateb i’r materion sydd bwysicaf yn lleol.”