Cronfa newydd i gefnogi cymunedau ledled Sir y Fflint

Mae Sefydliad Cymunedol Cymru yn partneru â Liverpool Bay CCS Limited a Cheshire Community Foundation i lansio cronfa newydd a fydd yn buddsoddi mewn prosiectau cymunedol ledled Sir y Fflint a chymunedau cyfagos yn Sir Gaer.

Bydd Cronfa Cymunedol Liverpool Bay CCS Limited yn darparu grantiau o hyd at £20,000 i elusennau, grwpiau cymunedol a sefydliadau dielw eraill sy’n gweithio i wneud gwahaniaeth cadarnhaol yn eu hardaloedd lleol. Mae’r gronfa’n rhan o raglen fuddsoddi gychwynnol bedair blynedd sydd wedi’i chynllunio i greu buddion parhaol i’r cymunedau sy’n gysylltiedig â seilwaith Cludo a Storio (T&S) Carbon Deuocsid (CO₂) Liverpool Bay CCS.

Bydd Sefydliad Cymunedol Cymru a Cheshire Community Foundation yn gweinyddu’r cyllid yn eu hardaloedd priodol, gan sicrhau bod gwybodaeth leol ac arbenigedd cymunedol yn helpu i gyfeirio’r buddsoddiad at y mannau lle gall wneud y gwahaniaeth mwyaf.

Bydd cyllid ar gael i brosiectau sy’n ehangu cyfleoedd dysgu, yn gwella ac yn diogelu’r amgylchedd naturiol, ac yn dathlu treftadaeth, diwylliant a hunaniaeth cymunedau lleol.

Mae’r gronfa hon yn gyfle i fuddsoddi yn y syniadau, yr egni a’r ymrwymiad sydd eisoes yn bodoli yng nghymunedau Sir y Fflint. Drwy gefnogi sefydliadau sy’n adnabod eu hardaloedd lleol orau, nod y rhaglen yw helpu cymunedau i adeiladu ar eu cryfderau, ymateb i heriau lleol a chreu buddion parhaol i genedlaethau’r dyfodol.

Dywedodd Katy Hales, Cyfarwyddwr Haelioni Sefydliad Cymunedol Cymru: “Rydyn ni’n falch o fod yn gweithio gyda Liverpool Bay CCS Limited ar y rhaglen fuddsoddi newydd hon ar gyfer cymunedau Sir y Fflint. Drwy ein gwaith gyda rhoddwyr a chyllidwyr, rydyn ni’n gweld bob dydd y gwahaniaeth y gall buddsoddiad hirdymor, sydd wedi’i dargedu, ei wneud pan fydd yn cael ei lywio gan wybodaeth leol ac anghenion cymunedau.

“Mae’r gronfa hon yn gyfle i gefnogi sefydliadau sydd â chysylltiadau dwfn â’r cymunedau maen nhw’n gweithio ynddynt ac sy’n creu newid cadarnhaol i bobl leol. Edrychwn ymlaen at helpu i gyfeirio cyllid at brosiectau a fydd yn gadael effaith barhaol ledled Sir y Fflint.”

Dywedodd Stefano Rovelli, Rheolwr Gyfarwyddwr Liverpool Bay CCS Limited: “Mae lansio Cronfa Cymunedol Liverpool Bay CCS yn gam pwysig ymlaen i’n prosiect Cludo a Storio. Rydyn ni’n deall pwysigrwydd creu buddion ystyrlon a pharhaol i’r cymunedau lle rydyn ni’n gweithredu, ac mae’r gronfa hon yn dangos ein hymrwymiad i’r rhanbarth. Wrth i Liverpool Bay symud ymlaen drwy’r cam adeiladu, rydyn ni’n falch o allu parhau i gefnogi ein cymunedau lleol ac edrychwn ymlaen at gydweithio â nhw ar brosiectau a fydd yn sicrhau gwerth cymdeithasol, amgylcheddol ac economaidd hirdymor.”

Agorodd y rownd gyntaf o gyllid am 12pm ddydd Mercher 9 Medi 2026. Mae manylion llawn, gan gynnwys y meini prawf cymhwysedd a chanllawiau ymgeisio, ar gael ar dudalen y gronfa yma.

Ar gyfer prosiectau yn Sir Gaer, ewch i wefan Cheshire Community Foundation i ddysgu mwy am y cyllid sydd ar gael yn yr ardaloedd cymwys.