Sefydliad Cymunedol Cymru yn penodi cadeirydd newydd
Mae Sefydliad Cymunedol Cymru wedi cyhoeddi penodiad cadeirydd newydd, Judi Rhys MBE.
Bydd Judi yn cymryd yr awenau gan Alun Evans sy’n camu i lawr fel cadeirydd, ddiwedd Rhagfyr, ar ôl wyth mlynedd yn y rôl.
Mae Judi, sydd â mwy na 18 mlynedd o brofiad mewn uwch rolau yn y sector elusennol, yn ymuno â’r Sefydliad o elusen Gofal Canser Tenovus lle treuliodd bum mlynedd yn rôl Prif Weithredwr. Yn ystod ei hamser yng Ngofal Canser Tenovus, ymgyrchodd Judi yn ddiflino i fynd i’r afael ag anghydraddoldebau a gwella canlyniadau i bawb sydd wedi’u heffeithio gan ganser ledled Cymru.
Mae Judi wedi gweithio yn y trydydd sector ers 2006 mewn amryw o rolau uwch arweinyddiaeth mewn elusennau iechyd a gofal cymdeithasol, ac fel Prif Swyddog Gweithredol ers 2013. Mae hi wedi dal nifer o rolau ymddiriedolwr elusen, gan gynnwys Samariaid Cymru a Chymdeithas Alzheimer. Mae hi yn Gyfarwyddwr gyda Sport Wales, a bu’n gyfarwyddwr gyda Iechyd Cyhoeddus Cymru tan 2022. Dyfarnwyd MBE i Judi yn 2021 am wasanaethau i’r sector gwirfoddol.
Ar ei phenodiad, dywedodd Judi:
“Mae’n anrhydedd cael fy newis fel Cadeirydd nesaf Sefydliad Cymunedol Cymru. Rwy’n edrych ymlaen at weithio gyda’r staff a’r ymddiriedolwyr gwych i adeiladu ar eu heffaith sydd eisoes yn drawiadol, gan gefnogi sefydliadau llawr gwlad ym mhob cwr o Gymru. Diolch o galon i’r Cadeirydd presennol, Alun Evans am ei flynyddoedd lawer o wasanaeth ymroddedig.”
Dywedodd Alun Evans, Cadeirydd presennol Sefydliad Cymunedol Cymru:
“Rwyf wrth fy modd bod Judi am fy olynu fel Cadeirydd Sefydliad Cymunedol Cymru. Rwy’n hollol hyderus fy mod yn gadael y Sefydliad mewn pâr diogel iawn o ddwylo.”
Dywedodd Richard Williams, Prif Weithredwr Sefydliad Cymunedol Cymru:
“Rydym yn edrych ymlaen at groesawu Judi i Sefydliad Cymunedol Cymru. Mae’n gyfnod cyffrous i ni i gyd. Mae Judi wedi ymrwymo’n ddwfn i wella bywydau yng Nghymru a bydd yn dod â chyfoeth o brofiad i’r bwrdd a fydd yn helpu i lunio ac arwain ein gwaith i gefnogi cymunedau yng Nghymru.
Ar ran pawb yn Sefydliad Cymunedol Cymru, hoffwn fanteisio ar y cyfle hwn hefyd i rannu ein diolch am gyfraniad rhagorol Alun Evans yn ystod y cyfnod hwn fel Cadeirydd ac am ei gefnogaeth bersonol anhygoel i mi a’r tîm. Hoffem ddymuno’r gorau iddo i’r dyfodol.”
