Cronfa True Venture

Sefydlwyd y Gronfa True Venture mewn partneriaeth â True Venture Foundation i gynnig cymorth ychwanegol i glybiau chwaraeon cymunedol bach sy’n gweithio ledled Gogledd Cymru gyda phlant a phobl ifanc i’w hannog i roi cynnig ar chwaraeon, caru chwaraeon a pharhau i wneud chwaraeon.

Bydd y gronfa’n blaenoriaethu grwpiau sy’n cynnig cyfleoedd chwaraeon unigol* fel athletau, nofio, bocsio, beicio ac ati a rhai aml-chwaraeon fel triathlon ac ati, yn hytrach na gweithgareddau chwaraeon grŵp/tîm fel rygbi, pêl-droed, hoci ac ati.

Anogir grwpiau chwaraeon cymunedol lleol sy’n gweithredu yn y trydydd sector ledled Ynys Môn, Gwynedd, Conwy, Sir y Fflint, Sir Ddinbych a/neu Wrecsam i wneud cais am gyllid i gefnogi eu gwaith gyda phlant a phobl ifanc.

Bydd y gronfa’n cefnogi:

• clybiau chwaraeon bach sy’n canolbwyntio ar chwaraeon unigol/aml-chwaraeon, fel y nodir uchod*, i godi eu safonau i’w helpu i gynnig y gweithgareddau a’r cyfleoedd a restrir isod
• darparu gweithgareddau i annog mwy o blant a phobl ifanc i roi cynnig ar chwaraeon drwy gynyddu mynediad at gyfleoedd chwaraeon, gan gynnwys, er enghraifft, sesiynau blasu gyda model cynaliadwy
• gweithgareddau a fydd yn annog plant a phobl ifanc i garu chwaraeon, drwy godi eu dyheadau i ystyried chwaraeon cystadleuol a/neu gystadlu ar lefel uwch yn y gamp/campau o’u dewis
• gweithgareddau sy’n galluogi plant a phobl ifanc i barhau i wneud chwaraeon, drwy gynnal cyfranogiad rheolaidd yn y gamp/campau o’u dewis, boed yn gystadleuol neu mewn agwedd arall fel hyfforddi neu ddyfarnu

Rydym yn annog grwpiau i feddwl sut y byddant yn gwella hygyrchedd i’r rhai nad ydynt yn cael eu gwasanaethu’n ddigonol neu sy’n agored i niwed, gan gynnwys y rhai o gefndiroedd nodweddion gwarchodedig fel y nodir yn Neddf Cydraddoldeb 2010 ac unigolion o’r cymunedau mwyaf difreintiedig yng Nghymru.

Mae grantiau rhwng £500 a £2,500 ar gael i grwpiau sy’n bodloni’r meini prawf uchod.

Mae enghreifftiau o geisiadau y byddem yn disgwyl eu gweld fel a ganlyn:

• Offer i allu cynnal mwy o sesiynau blasu
• Rhaglenni ac ymgyrchoedd marchnata i ddenu plant i mewn i’r gamp
• Cyrsiau hyfforddi ar gyfer hyfforddwyr i gefnogi plant a phobl ifanc i wella a thyfu
• Llogi mwy o leoliadau i alluogi mwy o sesiynau neu sesiynau hirach, wedi’u darparu trwy fodel cynaliadwy
• Cost aelodaeth neu gysylltiad â’r corff chwaraeon perthnasol i wella llywodraethiant

Wrth wneud cais am gyllid prosiect, cofiwch fod yn well gan y Gronfa ariannu eitemau cyflawn yn hytrach na chyfrannu at dreuliau ehangach. Er enghraifft, mewn rownd ariannu ddiweddar, cefnogodd y gronfa brynu 8 lletem cychwyn strôc gefn, ond ni wnaeth ariannu adran o ffensys ar gyfer diogelwch lleoliadau.

DS. Nid yw’r rhestr hon yn gynhwysfawr a byddem wrth ein bodd yn gweld syniadau newydd, arloesol. Rydym yn eich annog i drefnu galwad gyda’n Swyddog Grantiau i drafod eich prosiect yn fanylach cyn gwneud cais. Gall y Swyddog Grantiau eich cyfeirio at y lle cywir am unrhyw gymorth pellach y gallai fod ei angen arnoch neu gall eich cynghori os nad yw’ch prosiect yn cyrraedd ein disgwyliadau, er mwyn arbed amser ac ymdrech ddiangen i chi.

Mae’r gronfa am gefnogi clybiau chwaraeon cymunedol, grwpiau cyfansoddiadol a chyrff rhanbarthol lleol ar lawr gwlad, ond bydd yn ystyried ceisiadau gan gyrff chwaraeon sydd wedi’u lleoli y tu allan i Ogledd Cymru os yw’r cais yn ymwneud â sefydlu grŵp lleol yng Ngogledd Cymru.

Rhaid i chi fod yn un o’r canlynol:

• Grŵp Cyfansoddiadol
• Elusen Gofrestredig neu Sefydliad Corfforedig Elusennol
• Cwmni dielw Cyfyngedig Trwy Warant gyda nodau elusennol a chlo asedau a enwir
• Cwmni Budd Cymunedol gyda chlo asedau a enwir
• Menter Gymdeithasol

Byddai True Venture Foundation wrth eu bodd o glywed gennych os ydych chi’n teimlo bod gennych brosiect sy’n gysylltiedig â nodau’r gronfa hon ond nad yw’n bodloni terfynau ariannu neu feini prawf allweddol eraill. Os mai dyma’r achos, cysylltwch â info@trueventure.org.uk